Monday, March 10, 2014

આગવા અનોખા... શ્રી પ્રતિકભાઈ વૈધ

આજની મારી શાળા મુલાકાતે મને આ પોસ્ટ લખવા પ્રેરીત કર્યો...
મારા ક્લસ્ટરની મુખ્ય શાળા એટલે નદીશાળા. મારું ક્લસ્ટર નદીશાળા જૂથ સંસાધન તરીકે જ ઓળખાય આથી સ્વાભાવિક છે મારી મુલાકાત નિયમિત પણે આ શાળામાં થતી જ હોય. મારી આ મુલાકાત દરમિયાન મને આ શાળાના તમામ શિક્ષકો મળે એ પણ સ્વાભાવિક જ કહી શકાય. આજે મને લાગ્યું કે મારા ક્લસ્ટરની શાળાઓની માહિતીતો હું બ્લોગ પર મુકાતો જ રહું છું આજથી મારા શિક્ષક ભાઈ-બહેનો, વિદ્યાર્થીઓની ખાસિયત અને તેમની આગવી અનોખી બાબતો પણ આપની સમક્ષ મુકવાનું શરું કરુતો ?? અને એનો પ્રથમ મણકો એટલે મારી નદીશાળા ક્લસ્ટરની નદીશાળા શાળાના શિક્ષક શ્રી પ્રતિકભાઈ ભરતભાઈ વૈધ. આમતો તેઓ અમારી શાળામાં આવ્યે માંડ માંડ છ મહિના થયા હશે પરંતુ ગ્રામજનો,વિદ્યાર્થીઓ સાથે મેળવેલ ઘરોબો જોતાં લાગે કે પ્રતિકભાઈ વર્ષોથી આ શાળામાં કે આ ગામમાં રહેતાં હશે !! સ્વભાવે સરળ, દરેક કામને દિલથી કરનાર પ્રતિકભાઈ પોતાની ત્રણ વર્ષ જેટલી શિક્ષક તરીકેની સિનીયોરીટી સુરેન્દ્રનગરમાં છોડી અમારી શાળામાં આવ્યા. આમતો તેઓ ગણિત-વિજ્ઞાનના શિક્ષક છે પરંતુ તેઓ પ્રસિદ્ધિ પામ્યા સંગીત શિક્ષક તરીકે. પ્રતિકભાઈનો પૂરો પરિવાર સંગીતમાં વિશારદ હોઈ સંગીત પ્રત્યે તેમનું બંધન સમજી શકાય.
(રેકોર્ડીંગ સ્ટુડીયોમાં ગીત ગાતા પ્રતિકભાઈ)

આ સત્રની શરૂઆતમાં અમારી મુલાકાત અમદાવાદ અંધજન મંડળના રેકોર્ડીંગ સ્ટુડીયોમાં થઇ. અહી અમે રાજ્યની પ્રજ્ઞા શાળા માટેની ધોરણ ૧ થી ૫ ના કાવ્યોની ઓડિયો સીડીના  રેકોર્ડીંગ તેમજ તૈયારી માટે મળેલા. અઠવાડિયા જેટલો સમય સાથે રહ્યા અને આ સમયે એમને મળવાનો અને સમજવાનો મોકો મળ્યો. જોગાનુજોગ એ દિવસોમાં જ ધોરણ 6 થી   8     ના શિક્ષકોની ભરતી અને પ્રતિકભાઈ પણ જીલ્લા પસંદગીમાં ગયા. તેમને અમદાવાદ જીલ્લો મળ્યો અને મારા ક્લસ્ટરની શાળા એટલે નદીશાળા પણ મળી.
(રેકોર્ડીંગ સ્ટુડીયોમાં ક્મ્પોઝીસન)

પ્રતિકભાઈ ધોરણ ૧ થી ૫ પ્રજ્ઞા શાળાઓ માટે તૈયાર થયેલ કાવ્યોની સીડીમાં ક્મ્પોઝીસર અને સિંગર છે. તેઓએ ગયા મહીને જીલ્લા શિક્ષણ અને તાલીમ ભવન, અમદાવાદ (ગ્રામ્ય) દ્વ્રારા તૈયાર કરવામાં આવેલ  ધોરણ ૭ ના કાવ્યોની સીડી તૈયાર થઇ રહી છે તેમાં પણ ક્મ્પોઝીસન અને ગાવાનું કાર્ય સાંભળ્યું છે. અમારા નદીશાળા શાળાના વિદ્યાર્થીઓ હવે સૂરમાં ગાય છે અને પ્રાર્થના સભા સંગીતમય વાતાવરણ બનાવી દે છે.
(બાયસેગમાં પ્રાર્થના રજૂઆત)

પ્રતિકભાઈ માત્ર સંગીત માટે જ કામ નથી કરતાં. તેઓ ગણિત- વિજ્ઞાન વિષયના શિક્ષક  છે અને વર્ગમાં જુદા-જુદા પ્રયોગો કરતા રહે છે. વિદ્યાર્થીઓ સાથે તેમણે આત્મીયતા કેળવી હોઈ ખુશ થઇ વિદ્યાર્થીઓ તેમના વર્ગમાં કામ કરતા જોવા મળે. વિદ્યાર્થીઓને કોમ્પ્યુટર ટેકનોલોજીમાં પણ તેઓ શિક્ષિત કરી રહ્યા છે. આનંદની વાત તો એ કહી શકાય કે તેઓએ વિદ્યાર્થીઓને નેટનો ઉપયોગ કરતા શીખવ્યું અને વિદ્યાર્થીઓ દ્વારા મને તેમના વર્ગખંડની માહિતી આપતા મેઈલ કરવામાં આવી રહ્યા છે. તેમણે તેમના વર્ગના કેટલાક વિદ્યાર્થીઓના પણ મેઈલ આઈડી તૈયાર કરાવ્યા. ક્લસ્ટર કક્ષાની એક દિવસીય શિક્ષક તાલીમમાં તજજ્ઞ તરીકે પ્રતિકભાઈ ઘણા ઉપયોગી થઇ રહ્યા છે. મને  મને ગર્વ છે મારા ક્લસ્ટરના દરેક શિક્ષક આગવા અનોખા છે. પ્રતિકભાઈની કેટલીક તસ્વીર અહી આપના માટે...

(વર્ગખંડમાં વિજ્ઞાન શિક્ષણ)

(શિક્ષક તાલીમમાં તજજ્ઞ તરીકે)

(શિક્ષક તાલીમમાં ટેકનોલોજીણો ઉપયોગ કરતા...)
 મને  મને ગર્વ છે મારા ક્લસ્ટરના દરેક શિક્ષક આગવા અનોખા છે. 

No comments: